自從上次部4V領野之後，我對大部份不知名的車房已經失去信心，估唔到香港地咁多古惑車房存在，真係諗起都怕，家陣我只係信肥仔大偈，最起碼我覺得只有佢最為可靠，仲唔會搵我笨添。

講開好朋友，不得不提當年黃竹坑駕駛學院同期畢業o既「林仔」。論外型；林仔有幾分似藝人謝霆X，唯一唔同者，林仔無亞霆鋒咁Cool，再加上天生甜嘴舌滑，故此特別有異性緣，搞到女朋友多到不得了，大家唔好以為林仔係花心大少，其實佢已經有個準備結婚o既知心女友「雯雯」，真係睇唔出呀！

我曾經問林仔既然已經有雯雯咁好o既女朋友，點解唔收心養性呢？當林仔解釋左比我聽之後，我就明白何謂男人最痛！

原來林仔跟雯雯係中學同學，畢業後雯雯就去讀師範，而林仔就轉去做金融行業，經過幾年之後，女o既已經是為人師表，男o既依然故我，大家唔好以為雯雯個樣平凡，其實雯雯個樣不知幾清純可愛，帶有幾分近日上演套台灣片：那些年，我們一起…戲中的女主角特別o既氣質，真係唔明林仔點解會見異思遷！

謎底終於比我解開，有次我同林仔去左酒吧飲野，幾杯到肚後，佢就講出雯雯私隱我知，醉語中盛讚雯雯係一個好女仔兼做老婆o既好材料，自從大家有進一步關係後，先知佢係「寧波美女」，為左唔想傷害雯雯，唯有自己犧牲一下，係外面尋求另類滿足。唔怪得之我每次見佢拖出黎o既女伴，件件胸前都十分飽滿，胸前掛帥，一於唔理個樣，最緊要有肉！

林仔乃金融從業員，但經濟能力只係一般而已，買二手車是唯一o既選擇。我同佢睇過幾次車後，次次都失望而回，唔係部車極殘，就係價錢唔啱，無奈。

我曾經打過電話比肥仔大偈，問佢車行有無好野介紹，佢話最近香港二手車D車價貴，加上日圓匯率已過十算，老細已經再無從日本返二手車，所以暫時幫佢唔到，但會幫我留意喎。

話說林仔有日經過九龍某車行睇中一部烈火戰車（04年CBR600RR），見機不可失馬上落訂五仟作實。佢事成之後先話我知，既成事實我亦無意見，反正我唔熟呢間車行，上次我唔好彩而已，不能一蓋而論。

林仔拎車當日，我專登請假陪佢拎車，第一次見到部車之後，我就發覺林仔領野，雖然部車外觀（套啡呤）幾靚，但係我總覺得部車怪怪地，一時間又唔知點形容。我為左穩陣起見，建議林仔同我一齊到肥仔大偈度比佢望望部車先，相信好多車友買部二手車返來，唔多唔少都會搵間相熟車房跟進。

肥仔大偈望住部車，成日人呆左成分鐘，林仔問我佢係咪有病？我話唔係佢有病，可能係部車太正，妒忌你都唔定喎。等左陣肥仔大偈開口，仲問林仔知唔知部車有問題，空氣突然停頓下來，大家都呆左…！

根據肥仔大偈話，Honda CBR600RR響2003年到2006年生產同款o既CBR600RR，到2006年中先再轉款。

2003年初代的CBR600RR，頭擔設計比較保守，源用「正Fork」同埋「非放射鮑魚」，2006改良後，已經使用「倒Fork」同埋「放射鮑魚」，換言之2004年o既車款同2006年款式響頭擔上分別最大。

而林仔呢部2004年o既CBR600RR則為倒Fork同埋使用放射式鮑魚，再加上部車包圍超級新淨，一眼睇就知國內產品，按道理部車有可能曾經發生有較嚴重意外，經維修後先換上較後期款式o既頭擔。

肥仔大偈為求更加清晰，立即打電話去代理查詢，經報上車架編號同埋引擎號碼，以便再次確認呢部「擬似問題車輛」o既真實性。代理效率奇高，確認呢部係2004年製造o既CBR600RR，至於套頭擔點解會變左新款倒Fork，相信大家心知肚明，唔駛再講喇。

錢比左，又過埋戶，大家認為可以點做呢？林仔唯有接受現實，我安慰林仔之餘，並叫肥仔大偈幫幫忙去試下部車，睇下有乜野問題，如果部車有乜事，先再想辦法。

經過香港東區走廊一轉來回測試之後，肥仔大偈話部車無乜野特別，只係有部份損耗品需要更換，可能上手改頭擔時套波子盆裝得唔好而引致虛位比較大，換左後應該無事，加上頭尾輪胎的生產日期距依家已經有四年，再換埋佢就更加穩陣。

我偷偷望下林仔，佢呢個時候已經變得六神無主，作為好朋友的我當然希望林仔開心返，於是再問肥仔大偈，如果依你所言整晒所有野，部車玩唔玩得過先？肥仔回答話：「信我啦，兄弟！」

「好！就憑你一句，我信你」，今次居然比林仔搶先回答。

我從林仔眼中依稀顯示無比信念，就正如佢每次見到心儀的「哺乳類異性」一樣，真係令人感動！

三日之後的今日，肥仔大偈打電話比我，話林仔部車已經搞掂，我問佢部車而家仲有乜野問題，以免林仔失望多一次，肥仔大偈話佢已經試左車，部車都好正常喎，無病無痛，放心駕駛啦。

我去到車行度，已經見到林仔同埋佢個女性朋友。嘩，利害，邊有咁跨張架，睇來林仔對任何哺乳類異性追求已經到達頂點，至於個樣就見人見智。肥仔大偈交車比林仔後，一對癡男慾女就登上CBR600RR，由於林仔女友身裁特別驕人，加上跑車坐姿前傾，爽呀…
 

目送林仔離開，我同肥仔大偈都不知幾羨慕，肥仔大偈個老闆德叔忽然間走埋來吹水仲問我：「唔知林仔背部有咩感覺呢？」

我答：「背部應該好辛苦，壓力好大…」

德叔話：「壓力點樣大呀？」

我答：「好難講，我未試過喎，真係想試下！」

肥仔大偈話：「我都想試下，有無辦法？」

德叔話：「有，收工去街市，買個沙田柚切開佢，然後蒸熱佢放係背後試試。」

三條友仔正幻想之際，車友曾榮來到車行，佢睇到我地三個人眼定定，問佢咪撞邪？我話係呀，好大，好邪！

言歸正傳，講返林仔部車先，肥仔大偈話CBR600RR屬好車一部，在設計上較為適合斯文o既車友駕駛，加上坐姿無R6咁進取，一般遊車河係唔錯的選擇。如果買R6的話，對駕駛技術亦相應提高，總之就係各有所長，但論市場接受情度，R6則為首選。

至於呢套頭擔睇來並唔係新裝上去，可能原車主炒車後再從二手市場購買亦唔定，但由於CBR600RR車系市面流通甚多，即使響日本o既二手零件市場內，亦可以購買，所以並不一定是贓物，聽完之後我先至放心，希望林仔部CBR600RR無事無幹喇。

返到屋企後，我對住塊鏡望下自己，覺得自己都幾靚仔，點解會無女朋友？唔知幾時我傻強可以脫離單身宅男行列呢？

大家唔好笑我，其實我已經有目標，就係公司新來o既女同事Fanny，可惜佢已經有男朋友，加上我假假地都係佢同事兼上司，決不會搞辦公室戀情，除非Fanny主動暗戀我，咁我就破誡一次咁多啦，嘻嘻……

相關內容

《大偈與傻強》－第一集Vol.1

全段完－按這裡返回主頁